മകൾക്കായി 

കണ്മണിപ്പൊന്മകൾക്കായ്ക്കത്തിനിൽക്കുന്ന
കർപ്പൂരദീപമാണച്ഛൻ
കൈകാൽ വളരുന്നതൊക്കെയുൾക്കണ്ണാലെ
കണ്ടുറങ്ങീടുന്നതമ്മ

പൂവുപോൽ സ്നിഗ്ദ്ധമാം പൂമേനിനോവാതെ
ചുംബനപ്പൂകൊണ്ടു മൂടി
അമ്പിളിമാമന്റെ കൊമ്പത്തൊരൂഞ്ഞാലിൽ
ചാഞ്ചക്കമാട്ടിടാം നിന്നെ

മേഘം വിരിച്ച നിരാലംബ ശയ്യയിൽ
ചായുറങ്ങുന്ന നിലാത്തിങ്കൾ പോൽ
തൂവൽക്കിടക്കയിൽ വീണുറങ്ങുന്ന നിൻ
ചാരെ ഞാൻ താരമായ് കാവൽ നിൽക്കും